Maharashtra Weather Alert | राज्यात अवकाळीचा जोर ओसरला; आता कोकण किनारपट्टीला उन्हाच्या झळा अन् उकाड्याचा फटका
पुणे : Maharashtra Weather Alert | महाराष्ट्रात गेल्या काही दिवसांपासून विविध भागांत थैमान घालणाऱ्या अवकाळी पावसाने आता विश्रांती घेतली आहे. मात्र, पावसाचे संकट दूर होताच राज्यावर आता कडाक्याच्या उन्हाचे सावट निर्माण झाले आहे. भारतीय हवामान विभागाने (IMD) दिलेल्या ताज्या अंदाजानुसार, पुढील २४ ते ४८ तास संपूर्ण राज्यासाठी, विशेषतः कोकण किनारपट्टीसाठी अत्यंत महत्त्वाचे असणार आहेत.
मुंबईसह ठाणे, पालघर, रायगड, रत्नागिरी आणि सिंधुदुर्ग या सहा जिल्ह्यांमध्ये हवामान विभागाने ‘यलो अलर्ट’ जारी केला आहे. या भागात उष्ण आणि कमालीचे दमट (Hot and Humid) हवामान राहण्याची शक्यता आहे. तापमानाचा पारा जरी ३६ ते ३८ अंश सेल्सिअसच्या दरम्यान असला, तरी हवेतील आर्द्रतेमुळे प्रत्यक्ष जाणवणारी उष्णता अधिक असेल. यामुळे नागरिकांना प्रचंड घामाचा आणि अस्वस्थतेचा सामना करावा लागू शकतो.
दुसरीकडे, मध्य महाराष्ट्र, मराठवाडा आणि विदर्भात उन्हाचा चटका अधिक तीव्र होणार आहे. या भागांतून ढगाळ वातावरण निवळले असून सूर्यप्रकाश थेट जमिनीवर पडत असल्याने तापमानात मोठी वाढ नोंदवली जात आहे. विदर्भात काही ठिकाणी तापमान ४० अंश सेल्सिअसच्या पुढे जाण्याची शक्यता आहे. मध्य महाराष्ट्रातील सातारा आणि लगतच्या भागात एखाद-दुसरी पावसाची सर वगळता उर्वरित राज्यात हवामान प्रामुख्याने कोरडे राहणार आहे.
