Pune FDA News | पुणे : FDA ची मोठी कारवाई ! मार्केट यार्ड, वडगाव बुद्रुक, धायरी, येवलेवाडी, उरुळी देवाची आणि इतर अशा 14 आस्थापनांमध्ये उपवासाच्या पदार्थांमध्ये भेसळीचा संशय! 38 लाखांचा साठा जप्त
पुणे : Pune FDA News | खाद्यतेल आणि दुधानंतर आता उपवासासाठी वापरल्या जाणाऱ्या अन्नपदार्थांमध्येही भेसळीचा संशय आणि लेबलवरील त्रुटी आढळून आल्याने अन्न व औषध प्रशासनाने (FDA) मोठी कारवाई केली आहे. पुणे विभागातील तब्बल १४ आस्थापनांवर कारवाई करत ३८ लाख रुपयांहून अधिक किमतीचा अन्नपदार्थांचा साठा जप्त करण्यात आला आहे.
ही कारवाई पुणे, सातारा आणि सांगली जिल्ह्यांमध्ये करण्यात आली असून, यामध्ये साबुदाणा, भगर, राजगिरा, वेफर्स, खाद्यतेल आणि इतर उपवासाच्या पदार्थांचा समावेश आहे.
पुणे जिल्ह्यातील ११ आस्थापनांवर कारवाई
अन्न व औषध प्रशासनाने पुणे जिल्ह्यातील ११ आस्थापनांवर कारवाई केली आहे. यामध्ये गुलटेकडी मार्केट यार्ड परिसरातील भन्साळी उद्योग, उत्तम ट्रेडिंग कंपनी, राजेश एंटरप्रायझेस, पूजा सेल्स कॉर्पोरेशन आणि भन्साळी ट्रेडिंग कंपनी यांचा समावेश आहे.
तसेच वडगाव बुद्रुक येथील खंडेलवाल फूड प्रॉडक्ट्स, धायरीतील परमार फूड्स आणि जयलक्ष्मी स्नॅक्स एलएलपी, येवलेवाडी येथील आर. एस. यशराज फूड प्रोसेसिंग आणि उरुळी देवाची येथील जयश्री पुरोहित फूड्स या आस्थापनांवरही कारवाई करण्यात आल्याची माहिती समोर आली आहे.
साबुदाणा, भगर, राजगिरा, खाद्यतेलासह विविध पदार्थांचा साठा जप्त
या कारवाईदरम्यान राजगिरा, साबुदाणा, भगर, सागो, गूळ, शेंगदाणे, पामतेल, चिवडा, नवरत्न मिक्स आणि वेफर्स यांसारख्या विविध खाद्यपदार्थांचा साठा जप्त करण्यात आला.
तपासणीदरम्यान काही पदार्थांमध्ये भेसळ असल्याचा संशय व्यक्त करण्यात आला. तसेच उत्पादनांच्या लेबलवरील माहितीमध्ये त्रुटी, चुकीची छपाई आणि इतर अनियमितता आढळल्याने प्रशासनाने ही कारवाई केली.
पुण्याबरोबरच सातारा आणि सांगली जिल्ह्यांमध्येही अन्न व औषध प्रशासनाकडून कारवाई करण्यात आली आहे.
उपवासाच्या पदार्थांच्या गुणवत्तेचा प्रश्न ऐरणीवर
उपवासाच्या काळात साबुदाणा, भगर, राजगिरा आणि इतर पदार्थांची मोठ्या प्रमाणावर खरेदी केली जाते. अशा परिस्थितीत या पदार्थांमध्ये भेसळीचा संशय आणि लेबलवरील त्रुटी आढळल्याने अन्नसुरक्षेचा मुद्दा पुन्हा चर्चेत आला आहे.
दरम्यान, जप्त केलेल्या पदार्थांमध्ये प्रत्यक्ष भेसळ झाल्याचे अद्याप सिद्ध झालेले नसून, कारवाई ही संशयित भेसळ आणि लेबलिंगमधील त्रुटींशी संबंधित असल्याचे उपलब्ध माहितीतून स्पष्ट होते.
