Ajit Pawar Plane Crash | धक्कादायक बातमी : विमान अपघातात उपमुख्यमंत्री अजित पवार यांच्यासह 5 जणांचे निधन (Video)
पुणे : Ajit Pawar Plane Crash | राज्याचे उपमुख्यमंत्री अजित पवार यांच्या विमानाचा अपघात झाल्याची धक्कादायक माहिती समोर येत आहे. या अपघातात विमानातील 5 जणांचा मृत्यू झाल्याचे वृत्त असून त्यामध्ये अजित पवार यांचाही समावेश असल्याचे सांगितले जात आहे. लँडिंगच्या वेळी हा अपघात झाला असून विमान पूर्णतः जळून खाक झाल्याची माहिती आहे.
मुंबईहून बारामती येथे प्रचार सभेसाठी येत असताना हा अपघात घडल्याचे समजते. बारामती तालुका पंचायत समिती व जिल्हा परिषदेच्या निवडणूक प्रचार सभेनिमित्त अजित पवार आज बारामतीत सभा घेणार होते. नेहमीप्रमाणे ते विमानाने प्रवास करत होते.
बारामती विमानतळावर लँडिंगचा प्रयत्न अयशस्वी ठरल्याने विमान धावपट्टीजवळ आदळले आणि त्यानंतर विमानाला आग लागल्याचे प्रथमदर्शनी निदर्शनास आले आहे. अपघाताचे नेमके कारण अद्याप स्पष्ट झालेले नाही. मात्र वैमानिकाला धावपट्टीचा अचूक अंदाज न आल्यामुळे हा अपघात झाला असावा, असा प्राथमिक अंदाज व्यक्त केला जात आहे.
या घटनेमुळे बारामती परिसरात मोठी खळबळ उडाली असून नागरिकांनी घटनास्थळी मोठ्या प्रमाणात गर्दी केली आहे. राष्ट्रवादी काँग्रेसचे कार्यकर्तेही मोठ्या संख्येने घटनास्थळी दाखल होत आहेत. या घटनेमुळे संपूर्ण बारामती शहर शोकसागरात बुडाले आहे.
मिळालेल्या माहितीनुसार अजित पवार यांचे कुटुंबीय दिल्लीतील निवासस्थानी होते. शरद पवार, सुनेत्रा पवार, सुप्रिया सुळे आणि पार्थ पवार हे बारामतीच्या दिशेने रवाना झाल्याचे सांगितले जात आहे.
या अपघातात अजित पवार यांच्यासह विदीप जाधव, पिंकी माळी, कॅप्टन सुमित कपूर आणि कॅप्टन शांभवी यांचा मृत्यू झाल्याचे नमूद करण्यात येत आहे.
