Earthquake News | मराठवाडा हादरला! नांदेड-परभणीत भूकंपाचे धक्के; घराबाहेर धावले नागरिक
नांदेड : Earthquake News | मराठवाड्यातील नांदेड आणि परभणी जिल्ह्यांमध्ये आज भूकंपाच्या सौम्य धक्क्यांनी नागरिकांमध्ये मोठी घबराट पसरली आहे. सकाळी ८ वाजून ३३ मिनिटांच्या सुमारास हे धक्के जाणवले असून, विशेषतः नांदेड जिल्ह्यातील लोहा आणि कंधार परिसर तसेच परभणी जिल्ह्याच्या काही भागांना याचा फटका बसला आहे. भूकंपाची तीव्रता रिश्टर स्केलवर ४.५ इतकी नोंदवण्यात आली असून त्याचे केंद्र हिंगोली जिल्ह्यातील जांब येथे जमिनीखाली साधारण १० किलोमीटर खोलीवर होते अशी प्राथमिक माहिती समोर आली आहे.
ज्यावेळी हे धक्के जाणवले, त्यावेळी अनेक ठिकाणी जमिनीखालून मोठा आवाज आल्याचा अनुभव नागरिकांनी घेतला. या धक्क्यांमुळे घरांवरील पत्रे मोठ्या आवाजासह हलू लागले आणि घरातील भांडी व इतर वस्तू खाली पडल्या, ज्यामुळे जीव वाचवण्यासाठी लोक तातडीने घराबाहेर मोकळ्या मैदानात धावत आले. सुदैवाने या घटनेत कोणतीही जीवितहानी झाल्याचे वृत्त अद्याप मिळालेले नाही, मात्र काही जुन्या घरांच्या भिंतींना किरकोळ तडे गेल्याचे समोर आले आहे.
प्रशासनाने या घटनेची गांभीर्याने दखल घेतली असून जिल्हाधिकारी कार्यालयामार्फत नागरिकांना शांत राहण्याचे आणि घाबरून न जाण्याचे आवाहन करण्यात आले आहे. भूकंपप्रवण क्षेत्रात राहणाऱ्या नागरिकांनी सतर्क राहावे आणि अफवांवर विश्वास ठेवू नये, अशा सूचनाही देण्यात आल्या आहेत. महसूल विभागाचे कर्मचारी सध्या गावोगावी जाऊन नुकसानीचा आढावा घेत असून, परिस्थितीवर पूर्णपणे लक्ष ठेवून आहेत.
