Health Minister Prakash Abitkar | बीड जिल्हा रुग्णालयातील बडा डॉक्टर निलंबित; आरोग्यमंत्री प्रकाश आबिटकर यांची विधानसभेत घोषणा
मुंबई : Health Minister Prakash Abitkar | बीडचे जिल्हा शल्क चिकित्सक डॉ. अशोक थोरात (Dr Ashok Thorat) यांनी कोरोनाच्या काळामध्ये मोठ्या प्रमाणात भ्रष्टाचार केला आहे. डॉ. थोरात यांना निलंबित केले जावे, अशी मागणी भाजपच्या आमदार नमिता मुंदडा (Namita Mundada) यांनी विधानसभेत केली. त्यानंतर राज्याचे आरोग्यमंत्री प्रकाश आबिटकर यांनी अशोक थोरात यांना निलंबित केले जाणार असल्याची घोषणा केली.
विधानसभेत आमदार मुंदडा यांनी लक्षवेधी मांडत म्हटले की, बीडचे जिल्हा शल्क चिकित्सक डॉ. अशोक थोरात यांनी कोरोना काळात प्रचंड भ्रष्टाचार केला. कोट्यवधी रुपयांचा भ्रष्टाचार बीडमध्ये झाला. भ्रष्टाचार झाल्यानंतर त्यांची चौकशी झाली. चौकशीत ते दोषी सापडले. दोषी सापडल्यानंतर त्यांची बदली नाशिकला केली. तिथे त्यांनी काय केले हे माहीत नाही. पण परत जिथे भ्रष्टाचार झाला तिथे बीडमध्ये त्यांची सिव्हिल सर्जन म्हणून बदली करण्यात आली. हे बरोबर आहे का? जिथे इतका मोठा प्रचंड भ्रष्टाचार झाला, त्यांना पुन्हा इकडे परत कसे आणले गेले, या व्यक्तीवर तुम्ही गुन्हा दाखल करणार का? असा सवाल त्यांनी उपस्थित केला.
यावर आरोग्यमंत्री आबिटकर म्हणाले की, बीड जिल्ह्याचे सिव्हिल सर्जन आणि त्यांच्या कामकाजाबद्दल खूप गंभीर आक्षेप आहेत. निश्चितपणाने सिव्हिल सर्जन थोरात यांना आपण निलंबित करत आहोत. त्यांना निलंबित करून तीन महिन्यांच्या कालावधीत चौकशी पूर्ण करण्यात येईल. यात जे दोषी आढळतील, त्यांच्यावर कारवाई करण्यात येईल.
