Kothrud Pune Crime News | कोथरूडमधील फ्लॅटमध्ये ज्येष्ठ महिला जळालेल्या अवस्थेत सापडली, आत्महत्या केल्याचा संशय; पोलिसांकडून तपास सुरू
पुणे : Kothrud Pune Crime News | कोथरूड भागातील एका सोसायटीतील एका फ्लॅटमध्ये ज्येष्ठ महिला जळालेल्या अवस्थेत सापडली. ७६ वर्षाच्या या महिलेने पेटवून घेऊन आत्महत्या केल्याचा पोलिसांना संशय आहे.
कमल संपतराव घुगे (वय ७६) असे मृतावस्थेत सापडलेल्या महिलेचे नाव आहे. कोथरूड भागातील गुरुगणेशननगर परिसरातील एका सोसायटीत कमल घुगे राहायला आहेत. सोमवारी सकाळी साडेआठच्या सुमारास सोसायटीतील रहिवांशांनी अग्निशमन दलाला संपर्क साधून घुगे यांच्या फ्लॅटमधून धूर येत असल्याची माहिती दिली. या घटनेची माहिती मिळताच अग्निशमन दलाचे केंद्रप्रमुख प्रकाश गोरे आणि जवानांनी घटनास्थळी धाव घेतली. पहिल्या मजल्यावरील फ्लॅटचा दरवाजा जवानांनी उघडला. तेव्हा घुगे गंभीरिरत्या भाजलेल्या होत्या. फ्लॅटमधील इतर साहित्याला आग लागली नव्हती. घुगे यांना तातडीने रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. घुगे या एकट्याच्या भाड्याच्या घरात रहात होत्या, अशी माहिती अग्निशमन दलाचे केंद्रप्रमुख प्रकाश गोरे यांनी दिली.
या घटनेची माहिती मिळताच कोथरूड पोलिसांनी घटनास्थळी भेट दिली. घुगे एकट्या रहात होत्या. त्यांना मुलगा व मुलगी असून ते स्वतंत्र राहतात. घुगे यांनी पेटवून घेऊन आत्महत्या केली असावी, असा संशय आहे, असे वरिष्ठ पोलीस निरीक्षक संदिप देशमाने यांनी सांगितले.
