One Nation One Election | ‘एक देश-एक निवडणूक’ प्रस्ताव कॅबिनेट बैठकीत मंजूर ! केंद्र सरकारचा मोठा निर्णय
कायदा लागू होण्याकडे देशाचे लक्ष
पुणेरा आवाज – One Nation One Election | ‘एक देश-एक निवडणूक’ प्रस्ताव बुधवारी केंद्रीय कॅबिनेट बैठकीत मंजूर करण्यात आला. त्यामुळे आता हा कायदा कधीपासून लागू होईल याकडे संपूर्ण देशाचे लक्ष लागले आहे.
नरेंद्र मोदी पंतप्रधान झाल्यापासून सातत्यानं एक देश एक निवडणुकीचा मुद्दा मांडत आले आहेत. एक देश एक निवडणूक यासाठी ते खूप आग्रही आहेत. १५ ऑगस्टला त्यांनी लाल किल्ल्यावरुन देशाला संबोधित केलं. त्यावेळीही त्यांनी हा मुद्दा उपस्थित केला होता. एक देश एक निवडणूक यासाठी सगळ्याच राजकीय पक्षांनी पुढाकार घ्यावा, असं आवाहन मोदींनी केलं होतं. संपूर्ण ५ वर्षे राजकारण चालत राहायला नको. निवडणुका केवळ ३ ते ४ महिन्यांत व्हाव्यात. एकाचवेळी निवडणुका होत असल्यानं विकासकामांना खीळ बसणार नाही. निवडणूक आयोजनचा खर्चही कमी होईल, असं मोदी म्हणाले.
साडे अठरा हजार पानांचा अहवाल
एक देश एक निवडणूक याबद्दलचा अभ्यास करण्यासाठी केंद्र सरकारनं माजी राष्ट्रपती रामनाथ कोविंद यांच्या अध्यक्षतेखालील एक समिती स्थापन केली होती. या समितीनं आपला साडे अठरा हजार पानांचा अहवाल विद्यमान राष्ट्रपती द्रौपदी मूर्मू यांच्याकडे काही महिन्यांपूर्वीच सुपूर्द केला होता.
६२ राजकीय पक्षांशी संवाद
माजी राष्ट्रपती रामनाथ कोविंद यांच्या समितीनं अहवाल तयार करताना देशभरातील ६२ राजकीय पक्षांशी संवाद साधला. त्यातील ३२ पक्षांनी एक देश एक निवडणुकीला समर्थन दिलं. तर १५ पक्षांनी विरोध दर्शवला. उर्वरित १५ पक्षांनी कोणतीच भूमिका घेतली नाही. हे पक्ष तटस्थ राहिले.
अशा आहेत शिफारसी
लोकसभा आणि विधानसभेच्या निवडणुका एकाचवेळी व्हाव्यात. २०२९ पासून याची सुरुवात व्हावी. लोकसभेसोबतच सर्व विधानसभा निवडणुका पार पडल्यानंतर पुढच्या १०० दिवसांमध्ये स्थानिक स्वराज्य संस्थांच्या निवडणुका घेण्यात याव्यात, अशी शिफारस कोविंद यांच्या समितीनं दिलेल्या अहवालात आहे. त्यामुळे एका ठराविक अवधीत सगळ्याच निवडणुका पार पडतील. सध्याच्या घडीला लोकसभा आणि विधानसभेच्या निवडणुका वेगवेगळ्या वर्षांमध्ये, वेगवेगळ्या महिन्यांमध्ये होत आहेत.
इन्स्टाग्राम पेजला फॉलो करण्यासाठी खालील लिंकवर क्लीक करा👇👇👇
https://www.instagram.com/puneriawaj/
Follow puneriawaz.co.in : https://puneriawaz.co.in/
हे देखील वाचा
