Prashant Koratkar | ‘इंद्रजीत सावंत यांना धमकीचा फोन मीच केला होता’; प्रशांत कोरटकराची पोलीस कोठडीत कबुली
कोल्हापूर : Prashant Koratkar | छत्रपती शिवाजी महाराज आणि छत्रपती संभाजी महाराजांबद्दल आक्षेपार्ह विधाने करणारा आणि इतिहासकार इंद्रजित सावंत यांना धमकी देणारा प्रशांत कोरटकर याने आपल्या कृत्याची कबुली दिली आहे. पोलिस कोठडीत चौकशीदरम्यान त्याने ही कबुली दिली आहे.
समोर आलेल्या माहितीनुसार, पोलीस कोठडीतील चौकशीदरम्यान प्रशांत कोरटकरने ‘इंद्रजीत सावंत (Indrajit Sawant) यांना धमकीचा फोन मीच केला होता’, असे पोलिसांना सांगितले. त्यामुळे महाराजांविषयीही त्याने चुकीचे विधान केले असल्याची बाब खरी असण्याची शक्यता बळावली आहे.
कोल्हापूर पोलिसांनी बुधवारी (26 मार्च) मध्यरात्री पाच तास प्रशांत कोरटकरची चौकशी केली. चौकशीदरम्यान कोरटकरने त्याने केलेल्या महत्त्वाच्या आरोपांची कबुली दिली. त्याचबरोबर मोबाईलमधील डेटाही स्वत:च डिलिट केल्याचे कोरटकरने कबुल केले. या संपूर्ण प्रकरणामुळे होणारी अटक टाळण्यासाठी आपण हैदराबादमार्गे चेन्नईला जाण्याच्या तयारीत होतो, अशी माहितीही त्याने पोलिसांना दिली.
फॉरेन्सिक पथकाने (Forensic Team) बुधवारी कोरटकर याच्या आवाजाचे नमुनेही घेतले आहेत. जवळपास तीन ते चार तास ही प्रक्रिया सुरु होती. त्याचा अहवाला चार ते पाच दिवसांत येण्याची शक्यता आहे. कॉलच्या संदर्भात इंद्रजीत सावंत आणि प्रशांत कोरटकर यांच्यातील संभाषणाचे विश्लेषण फॉरेन्सिक टीमकडून केले जाईल. त्यासाठी इंद्रजीत सावंत यांच्याही आवाजाचे नमुने पोलिसांकडून घेण्यात आले आहेत.
दरम्यान, तब्बल महिनाभर फरार असलेल्या प्रशांत कोरटकरला अखेर 24 मार्चला तेलंगणामधून अटक करण्यात आली होती. त्यापूर्वी त्याने एक व्हिडीओ शेअर करत आपण इंद्रजीत सावंत यांना धमकी दिल्याचे आणि छत्रपती शिवाजी महाराज आणि छत्रपती संभाजी महाराज यांच्याविषयी आक्षेपार्ह वक्तव्य केल्याचा आरोप फेटाळला होता.
