Pune Crime News | गँगस्टर बंडु आंदेकरच्या नातुच्या घरी कारवाई करताना अडथळा आणल्याप्रकरणी दोघा वकिलांवर गुन्हा दाखल !
पुणे : Pune Crime News | गँगस्टर बंडु आंदेकर याचा नातू तुषार वाडेकर व स्वराज वाडेकर यांच्या ‘हीच आईची इच्छा’या इमारतीमध्ये घरझडती घेत असताना दोघा वकिलांनी या कारवाईला विरोध करुन सरकारी कामकाजात अडथळा आणल्याने त्यांच्याविरुद्ध समर्थ पोलिसांनी गुन्हा दाखल केला आहे.
पोलिसांनी या ठिकाणाहून २ पिस्तुलांसह चांदीचे दागिने, कागदपत्रे, रोकड असा ३७ लाख रुपयांचा माल जप्त केला आहे.
अॅड. मिथुन सुनिल चव्हाण (Adv. Mithun Sunil Chavan) आणि अॅड. प्रशांत चंद्रशेखर पवार (Adv. Prashant Chandrashekhar Pawar) अशी गुन्हा दाखल झालेल्या वकिलांची नावे आहेत.
याबाबत खंडणी विरोधी पथकाचे पोलीस हवालदार प्रफुल्ल बबन चव्हाण यांनी समर्थ पोलीस ठाण्यात फिर्याद दिली आहे. खंडणी विरोधी पथकाचे पोलीस अंमलदार मयुर भोकरे व हवालदार अमोल आवाड यांना बातमीदाराकडून माहिती मिळाली होती की, बंडु आंदेकर टोळीशी संपर्कात असलेल्या तन्मय गणेश कांबळे (रा. नाना पेठ, राजेवाडी) याच्याकडे पिस्टल असून ते त्याने लपवून ठेवलेली आहे. आंदेकर टोळीतील इतर साथीदारांसोबत मिळून काहीतरी गुन्हा करण्याच्या तयारीत आहे. या माहितीच्या आधारे पोलिसांनी तन्मय कांबळे याला पकडले. त्याने हे पिस्टल अल्पवयीन मुलाकडे ठेवायला दिले असल्याचे सांगितले. त्यानुसार बंडु आंदेकर याचा नातू स्वराज वाडेकर याच्या ‘हीच आईची इच्छा’ या चार मजली इमारतीत घरझडती १५ डिसेंबर रोजी सुरु केली होती. पोलिसांनी ८० हजार रुपयांचे २ देशी बनावटीचे पिस्टल, एक एअर गन, १७ लाख १५ हजार २६० रुपयांची रोकड, १८ लाख ८४ हजार ३८९ रुपयांच्या चांदीच्या वस्तु आणि ५७ हजार ५०० रुपयांच्या इतर वस्तु असा ३७ लाख ४० हजार रुपयांचा माल जप्त केला.
याच इमारतीतील भाडेकरु प्रभु मारुती लोकरे यांच्या घराची झडती घेण्यात येत होती. त्याचे पंचासमक्ष ई साक्षद्वारे व व्हिडिओ शुटींग केले जात होते. त्यावेळी दोघे जण अचानक आले. बंडु आंदेकर आमचे अशील असून तुम्ही पोलीस पलीकडच्या लेडीजच्या घराचे कुलूप तोडून आतमध्ये घुसले, असे बोलले. तेव्हा पोलीस निरीक्षक अश्विनी जगताप यांनी त्यांना चालू असलेली कारवाई ही कायदेशीर असून आम्हाला आमचे काम करु द्या, तुम्ही कायदेशीर मार्गाने विचारणा करा, त्याप्रमाणे उत्तर देऊ, असे समजावून सांगितले. तेव्हा त्या वकिलांनी ‘‘तुुम्ही ही जी घरझडतीची कारवाई ती चुकीची असून बोलायचे नाही, सी आर दाखल आहे का?. मी विचारतो सी आर दाखल आहे का मॅडम? हाऊस सर्चची परमिशन आहे का?. कशी काय कारवाई करु शकता’’अशा प्रकारचे शब्द वापरुन पोलीस निरीक्षक अश्विनी जगताप तसेच इतर पोलीस अधिकारी व अंमलदार यांना धमकी देऊन पोलिसांशी आक्रमकपणे बोलु लागले.
तेव्हा त्यांना अश्विनी जगताप यांनी पोलीस कायदेशीर कारवाई करीत असून वकिल साहेब विनाकारण त्रास देऊ नका, असे समजून सांगितले असताना देखील त्या वकिलांनी ‘‘आम्ही वकिल आहोत, क्लायंटची बाजू मांडण्यासाठी आलो आहोत,’’ जोरजोराने बोलून आमच्या पोलिसांवर दबाव आणण्याचा प्रयत्न केला. त्या दोन्ही वकिलांना पोलिसांची कायदेशीर कारवाई चालू असल्याची जाणीव असताना देखील या दोन्ही वकिलांनी पोलीस निरीक्षक अश्विनी जगताप तसेच इतर पोलीस अधिकारी व अंमलदार यांच्याशी हातवारे करुन वादविवाद घालून चालू असलेल्या सरकारी कायदेशीर कारवाईमध्ये आले. पोलिसांसमोर उभे राहून तावा तावाने बोलून ते करीत असलेल्या सरकारी कामामध्ये अडथळा निर्माण केला, असे फिर्यादीमध्ये म्हटले आहे. त्यानुसार पोलिसांनी अॅड. मिथुन चव्हाण व अॅड. प्रशांत पवार यांच्यावर गुन्हा दाखल केला आहे. वरिष्ठ पोलीस निरीक्षक उमेश गित्ते तपास करीत आहेत.
