Sangli Crime News | सांगली: चारित्र्याच्या संशयावरून पत्नीचा गळा आवळून खून, हातपाय मोडून मृतदेह विद्युत पंपाच्या पेटीत ठेवला; परिसरात खळबळ
सांगली : Sangli Crime News | चारित्र्याच्या संशयावरून पत्नीचा गळा आवळून खून केल्याची धक्कादायक घटना उघडकीस आली आहे. प्राजक्ता मंगेश कांबळे (वय-२८) असे खून झालेल्या महिलेचे नाव आहे. खून केल्यानंतर संशयित पती मंगेश चंद्रकांत कांबळे (रा. मांगले, मूळ रा. कोकरूड) स्वतःहून पोलिसात दुपारी हजर झाला. मृतदेह विद्युत पंपाच्या पेटीत घालून ठेवल्याचे समोर आल्याने परिसरात खळबळ उडाली होती. (Husband Kill Wife)
पोलिसांनी दिलेल्या माहितीनुसार, मंगेश व प्राजक्ताचा ८ वर्षांपूर्वी आंतरजातीय प्रेमविवाह झाला आहे. आरोपी मंगेशचा भाऊ निलेश आणि त्याची आई गेल्या पंधरा वर्षांपासून मांगले येथे वास्तव्यास आहेत. मांगले- वारणानगर रस्त्यावर जोतिबा मंदिरासमोर रामचंद्र वाघ यांच्या घरात ते भाड्याने राहतात. चार दिवसांपूर्वी मंगेश त्याची पत्नी प्राजक्ता व ६ वर्षांचा मुलगा शिवम्, ३ वर्षांची मुलगी शिवन्या मुंबईहून आई आणि भावाकडे राहायला आले होते. (Murder Case)
गुरुवार (दि.२७) सकाळी भाऊ निलेश आणि आई देववाडी येथे गेले होते. दरम्यान, सकाळी १० वाजताच्या दरम्यान पती-पत्नीत वाद झाला होता. तो वाद विकोपाला जाऊन मंगेशने प्राजक्ताचा ओढणीने गळा आवळून खून केला. त्यानंतर बाजूच्या खोलीत ठेवलेल्या विद्युत पंपाच्या मोडक्या पेटीत हातपाय मोडून मृतदेह घालून झाकून ठेवला.
त्यानंतर खोलीला बाहेरून कुलूप घालून भाऊ निलेश याला फोन करून ‘मी शिराळ्याला जाणार आहे, गाडी घेऊन ये’ असा निरोप दिला. भाऊ निलेश देववाडीतून मांगलेत आल्यानंतर मंगेशने भावाकडून गाडी घेऊन तो शिराळ्याकडे निघून गेला. याच दरम्यान मंगेशचा सहा ६ वर्षांचा मुलगा शिवम दारातच रडत होता. त्यावेळी निलेशने त्याला समजावून ‘काय झाले’ असे विचारले. त्यावेळी ६ वर्षांच्या शिवमने मम्मी-पप्पांचे भांडण होऊन पप्पांनी आईला मारून खोलीत ठेवल्याचे सांगितले.
निलेशने देववाडी येथील बहिणीला आणि तिच्या पतीला बोलवून घेतले. मंगेशला फोन करून ‘गोरक्षनाथ मंदिराजवळच थांब आम्ही येतो’ म्हणून सांगितले. त्यानंतर गोरक्षनाथ मंदिराजवळ जाऊन सविस्तर माहिती विचारल्यानंतर त्याने खून केल्याचे सांगितले. त्यानंतर या तिघांनीही त्याला ‘आम्हाला त्रास होईल, तू पोलिस स्टेशनला जाऊन माहिती दे’, असे सांगितले. त्यानंतर स्वतः तो शिराळा पोलिसात हजर झाला.
पोलिसांनी पंचनामा करून मृतदेह उत्तरीय तपासणीसाठी शिराळा येथील उपजिल्हा रुग्णालयात नेण्यात आला. याबाबत मयत प्राजक्ताची आई रंजना अर्जुन चांदणे (वय-४५) रा. कोकरूड यांनी शिराळा पोलिसांत फिर्याद दिली आहे. अपर पोलिस अधीक्षक रितू खोकर, उपविभागीय पोलिस अधिकारी मंगेश चव्हाण यांनी शिराळा येथे भेट देऊन घटनेची माहिती घेतली. या घटनेचा अधिक तपास शिराळा पोलिस ठाण्याचे पोलीस निरीक्षक सिद्धेश्वर जंगम करीत आहेत.
