Konkan Railway | होळीसाठी धावणार खास मेमू रेल्वे; कोकण प्रवाशांसाठी खुशखबर
ठाणे : Konkan Railway | कोकण रेल्वे प्रशासनाने होळी उत्सवाच्या पार्श्वभूमीवर प्रवाशांसाठी विशेष उपाययोजना करत दिवा ते चिपळूणदरम्यान ८ दिवसांसाठी अनारक्षित मेमू ट्रेन सेवा सुरू करण्याची घोषणा केली आहे. ही सेवा १ मार्च ते ८ मार्च 2026 या कालावधीत दररोज दोन्ही दिशांनी धावणार आहे. या सेवेमुळे प्रवाशांना होळीच्या सणात रेल्वे तिकीट मिळवण्यास सुलभता होईल.
गाडी क्रमांक 01159 दिवा स्थानकातून रात्री 11:25 वाजता निघून चिपळूण येथे सकाळी 6:30 वाजता पोहोचेल, तर 01160 चिपळूणहून दुपारी 3:30 वाजता निघून रात्री 11:10 वाजता दिवा येथे परत येईल. ही गाडी पूर्णपणे जनरल श्रेणीची असल्याने, प्रवाशांना आधी आरक्षण घेण्याची आवश्यकता नाही; स्थानकावरून थेट तिकीट घेऊन प्रवास करता येईल.
मार्गावर मुख्य थांबे म्हणजे दिवा, निळजे, पनवेल, रोहा, कोलाड, माणगाव, वीर, सापे वामने, करंजाडी, खेड, अंजनी आणि चिपळूण. रेल्वे प्रशासनाने प्रवाशांना सुरक्षित आणि आरामदायक प्रवासासाठी खबरदारी बाळगण्याचे आवाहन केले आहे. या विशेष मेमू सेवेमुळे होळी काळात कोकणच्या विविध ठिकाणी जाणाऱ्या प्रवाशांना मोठा लाभ होणार असल्याचे प्रशासनाचे म्हणणे आहे.
