Lt Gen Sandeep Jain | लेफ्टनंट जनरल संदीप जैन यांनी सदर्न कमांडची सूत्रे स्वीकारली
पुणे : Lt Gen Sandeep Jain | लेफ्टनंट जनरल संदीप जैन, एव्हीएसएम, एसएम यांनी 1 एप्रिल 2026 रोजी सदर्न कमांडचे जनरल ऑफिसर कमांडिंग-इन-चीफ म्हणून पदभार स्वीकारला. त्यांनी लेफ्टनंट जनरल धीरज सेठ, पीव्हीएसएम, यूवायएसएम, एव्हीएसएम यांची जागा घेतली असून धीरज सेठ यांनी आज उप लष्कर प्रमुख पदाची जबाबदारी स्वीकारली आहे.
नॅशनल डिफेन्स अकॅडमीचे माजी विद्यार्थी असलेल्या लेफ्टनंट जनरल संदीप जैन यांना जून 1988 मध्ये महार रेजिमेंटमध्ये नियुक्ती मिळाली होती. जवळपास चार दशकांच्या प्रदीर्घ आणि गौरवशाली कारकिर्दीत त्यांनी विविध आव्हानात्मक आणि महत्त्वाच्या पदांवर काम केले आहे.
लेफ्टनंट जनरल जैन यांनी अर्धविकसित भूभागात तसेच दक्षिण सुदानमधील संयुक्त राष्ट्रांच्या मोहिमेत इन्फंट्री बटालियनचे नेतृत्व केले आहे. याशिवाय त्यांनी स्ट्राइक कॉर्प्समधील इन्फंट्री ब्रिगेड, काउंटर इन्सर्जन्सी फोर्स आणि नॉर्दर्न कमांडमधील पिव्होट कॉर्प्सचेही नेतृत्व केले आहे. ऑपरेशन पवनमध्ये सहभाग, इथिओपियातील संयुक्त राष्ट्र मोहिमेत लष्करी निरीक्षक म्हणून सेवा, तसेच नियंत्रण रेषा आणि ईशान्य भारतातील उच्च उंचीवरील व दहशतवादविरोधी मोहिमांचा त्यांना मोठा अनुभव आहे. ते महार रेजिमेंटचे कर्नलही आहेत.
सदर्न कमांडची सूत्रे हाती घेण्यापूर्वी त्यांनी मुख्यालय सदर्न कमांड येथे चीफ ऑफ स्टाफ म्हणून काम केले. या काळात त्यांनी क्षमतावृद्धी, फोर्स रीस्ट्रक्चरिंग आणि एकूणच ऑपरेशनल सज्जता मजबूत करण्यात महत्त्वपूर्ण योगदान दिले.
लेफ्टनंट जनरल जैन यांनी आर्मी वॉर कॉलेजमधील हायर कमांड कोर्स तसेच केनियातील नॅशनल डिफेन्स कोर्स पूर्ण केला आहे. त्यांच्या उल्लेखनीय सेवेसाठी त्यांना अति विशिष्ट सेवा पदक आणि सेना पदकाने सन्मानित करण्यात आले आहे.
पदभार स्वीकारल्यानंतर त्यांनी सदर्न कमांड वॉर मेमोरियल येथे शहीद जवानांना श्रद्धांजली वाहिली आणि मुख्यालय साउदर्न कमांड येथे गार्ड ऑफ ऑनर स्वीकारला. यावेळी त्यांनी सांगितले की, सदर्न कमांड आपल्या विविध जबाबदारीच्या क्षेत्रांमध्ये, जसे की वाळवंटी भाग, रण आणि क्रीक सेक्टर, किनारपट्टी, बेट क्षेत्रे आणि अंतर्गत भाग, ऑपरेशनल सज्जतेवर सातत्याने भर देत राहील. तसेच ‘JAI’ फ्रेमवर्क अंतर्गत संयुक्त कार्यपद्धती, स्वदेशी क्षमता विकास आणि तंत्रज्ञान आत्मसात करण्यावर अधिक भर दिला जाईल, असे त्यांनी स्पष्ट केले.
