Pune ST Summer Special | पुणेकरांचा उन्हाळी प्रवास होणार सुखकर; गर्दी टाळण्यासाठी एसटी प्रशासनाचा 74 जादा बसेस सोडण्याचा निर्णय
पुणे : Pune ST Summer Special | उन्हाळी सुट्ट्यांच्या काळात गावी जाणाऱ्या प्रवाशांची संख्या प्रचंड वाढते, हीच बाब लक्षात घेऊन महाराष्ट्र राज्य परिवहन महामंडळाच्या (एसटी) पुणे विभागाने प्रवाशांना मोठा दिलासा दिला आहे. एप्रिल आणि मे महिन्यांत शाळा-महाविद्यालयांना सुट्ट्या असल्याने गावी जाणाऱ्यांची मोठी झुंबड उडते. प्रवाशांची ही गैरसोय टाळण्यासाठी आणि त्यांचा प्रवास अधिक सुसह्य करण्यासाठी पुणे विभागाने एकूण ७४ अतिरिक्त बसेस सोडण्याचा महत्त्वपूर्ण निर्णय घेतला आहे.
एसटी प्रशासनाने दिलेल्या माहितीनुसार, या विशेष जादा बसेस १४ एप्रिल ते १० जून २०२६ या कालावधीत धावणार आहेत. या काळात प्रामुख्याने कोल्हापूर, पंढरपूर, तासगाव, अक्कलकोट आणि गोंदवले यांसारख्या दक्षिण महाराष्ट्रातील शहरांसह जळगाव, सप्तशृंगी गड, कळवण, अकोला आणि अहमदपूर यांसारख्या लांब पल्ल्याच्या मार्गांवर प्रवाशांचा ओघ जास्त असतो. नियमित बसेसवर येणारा ताण कमी करण्यासाठी या मार्गांवर विशेष लक्ष केंद्रित करण्यात आले आहे. या नियोजनामुळे प्रवाशांना स्थानकावर ताटकळत उभे राहावे लागणार नाही आणि त्यांना वेळेत इच्छित स्थळी पोहोचता येईल.
केवळ अतिरिक्त बसेसच नव्हे, तर प्रवाशांच्या आधुनिक सुविधेसाठी पुणे विभागाच्या ताफ्यात ‘राजमाता जिजाऊ’ ही ५६ आसनक्षमतेची नवीन शटल बसदेखील दाखल झाली आहे. सध्या ही बस स्वारगेट ते बारामती या मार्गावर धावत असून, येत्या काळात अशा आणखी २५० बसेस एसटीच्या ताफ्यात टप्प्याटप्प्याने समाविष्ट केल्या जाणार आहेत. या नव्या गाड्यांमुळे उन्हाळ्यातील प्रवासाचा दर्जा उंचावण्यास मदत होणार आहे. उन्हाळी सुट्टीत प्रवासाचे नियोजन करणाऱ्या नागरिकांनी या जादा बसेसचा लाभ घ्यावा आणि संभाव्य गर्दी टाळण्यासाठी आगाऊ आरक्षण करावे, असे आवाहन पुणे विभागाचे विभागीय वाहतूक अधिकारी कमलेश धनराळे यांनी केले.
