Sangli Crime News | सांगलीतील माजी महापौरांचा आत्महत्येचा प्रयत्न; राजकारणात खळबळ
सांगली : Sangli Crime News | सांगलीतील राष्ट्रवादीचे नेते आणि माजी महापौर सुरेश आदगोंडा पाटील (Suresh Adgonda Patil) यांनी त्यांच्या निवासस्थानी गळफास घेऊन आत्महत्या करण्याचा प्रयत्न केल्याची धक्कादायक घटना समोर आली आहे. सुरेश पाटील यांना तत्काळ उषःकाल रुग्णालयात दाखल करण्यात आले असून तेथे अतिदक्षता विभागात त्यांच्यावर उपचार सुरू आहेत.
या घटनेची प्राथमिक नोंद विश्रामबाग पोलिस ठाण्यात केली आहे. सुरेश पाटील यांनी हे आत्महत्या करण्याचे टोकाचे पाऊल का उचलले, याचे कारण अद्याप समोर आले नाही. त्यांनी त्याच्या निवासस्थानी साडीने गळफास लावण्याचा प्रयत्न केला. कुटुंबीयांच्या लक्षात ही बाब आल्यानंतर त्यांना तातडीने रुग्णालयात दाखल केले. तेथे अतिदक्षता विभागात त्यांच्यावर उपचार सुरू करण्यात आले आहे.
सुरेश पाटील यांची प्रकृती सध्या स्थिर असल्याची माहिती डॉक्टरांकडून देण्यात आली. गेल्या तीन दशकांपासून सांगली जिल्ह्यातील राजकारण, व्यापार, शिक्षणक्षेत्र आणि समाजकारणात सुरेश पाटील यांना मानाचे स्थान आहे. त्यामुळे सुरेश पाटील यांनी आत्महत्येचा प्रयत्न केल्याची माहिती समोर येताच सांगलीकरांना मोठा धक्का बसला आहे.
