Sahakar Nagar Pune Crime News | नागरिकांना धक्का मारुन पाया पडण्याच्या बहाण्याने खिशातील पैसे चोरणाऱ्या दोघा सराईतांना केले जेरबंद; सहकारनगर पोलिसांची कामगिरी
पुणे : Sahakar Nagar Pune Crime News | पायी जाणार्‍या नागरिकाला विनाकारण धक्का मारुन पाया पडण्याचा बहाणा करुन खिशातील पैसे चोरणार्‍या दोघा सराईतांना सहकारनगर पोलिसांनी जेरबंद केले. (Arrest In Theft Case)
आस्लम इस्माइल शेख (वय २१, रा. नवीन म्हाडा, सातववाडी, हडपसर) आणि साद अकबर पठाण (वय २३, रा. वेस्टर्न गल्ली, सय्यदनगर, हडपसर) अशी अटक केलेल्यांची नावे आहेत. (Sahakar Nagar Police)
याबाबत दीपक रामराव मोरे (वय ३७, रा. धनकवडे पाटील टाऊनशिप, धनकवडी) यांनी सहकारनगर पोलीस ठाण्यात फिर्याद दिली आहे. हा प्रकार धनकवडीतील शाहू बँक चौकातील साईबा टी स्टॉलच्या बाजूला ९ एप्रिल रोजी घडला होता. मोरे हे पायी जात असताना मोटारसायकलजवळ उभे असलेल्या दोघांनी त्यांच्या पाठीमागून येऊन त्यांना धक्का दिला. धक्का लागल्यामुळे त्यांची माफी मागण्याकरीता पाया पडण्याचा बहाणा करुन त्यांच्या पँटच्या खिशामध्ये ठेवलेले ३० हजार रुपये नकळत काढून घेऊन ते निघून गेले होते. याबाबतची फिर्याद मोरे यांनी सहकारनगर पोलिसाकडे दिली. त्याचा तपास करीत असताना घटनेच्या अनुषंगाने पोलिसांनी दोघांना ताब्यात घेऊन चौकशी केली. त्यांनी गुन्ह्याची कबुली दिली. गुन्ह्यात वापरलेली मोटारसायकल पोलिसांनी जप्त केली आहे. पोलिसांनी दोघांना अटक केली आहे. अधिक चौकशीत त्यांनी आणखी एका नागरिकाचे १० हजार रुपये अशा पद्धतीने चोरल्याचे निष्पन्न झाले.
याबाबत कैलाश विश्वनाथ राजहंस (वय ५१, रा. कात्रज गाव) यांनी फिर्याद दिली आहे. हा प्रकार धनकवडीतील शंकर महाराज मठाजवळ १८ ऑक्टोबर २०२४ रोजी घडला होता. चोरट्यांनी त्यांच्या खिशातील १० हजार रुपये चोरुन नेले होते.
अपर पोलीस आयुक्त प्रविणकुमार पाटील, पोलीस उपायुक्त स्मार्तना पाटील, सहायक पोलीस आयुक्त राहुल आवारे, सहकारनगर पोलीस ठाण्याचे वरिष्ठ पोलीस निरीक्षक राहुल गौड, पोलीस निरीक्षक (गुन्हे) सुरेखा चव्हाण यांच्या मार्गदर्शनाखाली सहायक पोलीस निरीक्षक सागर पाटील, सहायक पोलीस उपनिरीक्षक बापू खुटवड, पोलीस अंमलदार अमोल पवार, बजरंग पवार,सागर सुतकर, किरण कांबळे, योगेश ढोले, महेश भगत, अमित पदमाळे, बालाजी केंद्रे, चंद्रकांत जाधव, महेश मंडलिक, खंडु शिंदे यांनी ही कामगिरी केली आहे.
