Pune Police Tadipari Action | कोंढवा, हडपसर, वानवडी भागातील 6 सराईत गुन्हेगारांना 2 वर्षासाठी केले तडीपार; खंडणी, फसवणूक, जीवे मारण्याचा प्रयत्न, गावठी दारु विक्री असे होते गुन्हे
पुणे : Pune Police Tadipari Action | पोलीस उपायुक्त डॉ. राजकुमार शिंदे यांनी कोंढवा, वानवडी आणि हडपसर परिसरातील ६ सराईत गुन्हेगारांना २ वर्षांसाठी पुणे शहर, पिंपरी चिंचवड आणि पुणे जिल्ह्यातून तडीपार केले आहे.
इम्तीयाज इद्रीस मेमन (वय ४५, रा. विठ्ठलनगर, हडपसर) याच्यावर खंडणी मागणे, फसवणुक करणे, शिवीगाळ करणे यासारखे ६ दखलपात्र गुन्हे दाखल होते. त्याला २ वर्षाकरीता तडीपार केले आहे.
गणेश बबन लोंढे (वय २४, रा. तरवडे वस्ती, महंमदवाडी रोड, हडपसर) याच्यावर सरकारी नोकरावर हल्ला करणे, चोरी करणे, दुखापत करणे, खासगी मालमत्तेचे नुकसान करणे, जीवे ठार मारण्याचा प्रयत्न करणे, बेकायदेशीर जमाव जमवणे, बेकायदेशीर हत्यार जवळ बाळगुन दहशत निर्माण करणे, बलात्कार करणे यासारखे एकूण १९ गुन्हे दाखल आहेत.
अविनाश अजय मिसाळ (वय २४, रा. घोरपडी बाजार, घोरपडी) याच्यावर बेकायदेशीर जमाव जमविणे, मारहाण करणे, जीवे ठार मारण्याचा प्रयत्न करणे, बेकायदेशीर हत्यार जवळ बाळगणे असे ४ गुन्हे दाखल आहेत.
हुसेन अब्बास पटेल (वय २३, रा. शिवनेरीनगर, कोंढवा) याच्यावर दुखापत करणे, मारहाण करुन धमकावणे, बेकायदेशीरपणे गावठी हातभट्टीची दारु विक्री करणे यासारखे ५ गुन्हे दाखल आहेत.
आकाश नरसय्या गुत्तेदार (वय २४, रा. पवारवस्ती, केशवनगर, मुंढवा) याच्यावर बेकायदेशीर गावठी हातभट्टीची दारु विक्री करणे यासारखे ४ गुन्हे दाखल आहेत.
आदित्य तानाजी पांडागळे (वय २०, रा. काटे चाळ, कोंढवा खुर्द) याच्यावर खुनाचा प्रयत्न करणे, दुखापत करणे, मारहाण करणे, बेकायदेशीर हत्यार बाळगणे, दहशत निर्माण करणे यासारखे ३ गुन्हे आहेत.
हे सर्व रेकॉर्डवरील गुन्हेगार आहेत. आगामी गणेशोत्सव, सणाच्या पार्श्वभूमीवर त्यांच्यावर तडीपारीची कारवाई करण्यात आली आहे.
जानेवारी २०२५ पासून आतापर्यंत परिमंडळ ५ मधून १३ सराईत गुन्हेगारांवर एम पी डी एप्रमाणे कारवाई करण्यात आली आहे. तसेच ९ मोका कारवाईमध्ये ५६ गुन्हेगारांना जेरबंद करण्यात आले आहे. २५ गुन्हेगारांना तडीपार करण्यात आले असून एकूण ९४ सराईत गुन्हेगारांवर ठोस कारवाई करण्यात आली आहे.
