Iran US War Ceasefire | अमेरिका-इराण युद्धविराम: जागतिक अर्थव्यवस्थेला मोठा दिलासा, कच्चे तेल स्वस्त अन् शेअर बाजारात तेजी
नवी दिल्ली : Iran US War Ceasefire | गेल्या काही दिवसांपासून अमेरिका आणि इराणमध्ये सुरू असलेला टोकाचा तणाव आता काहीसा निवळला असून, दोन्ही देशांनी दोन आठवड्यांच्या तात्पुरत्या युद्धविरामावर सहमती दर्शवली आहे. या सकारात्मक निर्णयामुळे जागतिक बाजारपेठेने सुटकेचा निःश्वास टाकला असून, याचे पडसाद आर्थिक स्तरावर उमटताना दिसत आहेत. या दोन आठवड्यांच्या कालावधीत कोणताही लष्करी हल्ला न करण्याचे आश्वासन अमेरिकेने दिले असून, बदल्यात इराणने जागतिक तेल वाहतुकीसाठी अत्यंत महत्त्वाची मानली जाणारी ‘होर्मुझची सामुद्रधुनी’ खुली ठेवण्यास मान्यता दिली आहे.
या युद्धविरामाच्या घोषणेनंतर आंतरराष्ट्रीय बाजारात कच्च्या तेलाच्या किमतीत १५ टक्क्यांपर्यंत मोठी घसरण झाली असून, ब्रेंट क्रूडचे दर प्रति बॅरल १०० डॉलरच्या खाली आले आहेत. यामुळे येणाऱ्या काळात जागतिक स्तरावर इंधन दरवाढ रोखण्यास मदत होणार आहे. दुसरीकडे, युद्धाचे ढग विरल्याने जगभरातील शेअर बाजारामध्ये उत्साहाचे वातावरण असून अमेरिकन मार्केटसह आशियाई बाजारांमध्येही मोठी तेजी पाहायला मिळत आहे. प्रामुख्याने जपान आणि दक्षिण कोरियाच्या बाजारांनी ५ ते ६ टक्क्यांची झेप घेतली असून गुंतवणूकदारांचा आत्मविश्वास पुन्हा वाढला आहे.
सध्या हा युद्धविराम केवळ १४ दिवसांसाठी असला, तरी या काळात चर्चेच्या माध्यमातून कायमस्वरूपी शांतता प्रस्थापित करण्याचे प्रयत्न अमेरिका आणि इराणकडून केले जातील. पाकिस्तान आणि इतर मित्र राष्ट्रांच्या मध्यस्थीनंतर झालेला हा करार जागतिक शांततेसाठी आणि कोसळणाऱ्या अर्थव्यवस्थेला सावरण्यासाठी अत्यंत महत्त्वाचा मानला जात आहे.
