Pune Baramati Crime News | सुप्यातील दुहेरी हत्याकांडाचा उलगडा; दोन महिलांच्या हत्येप्रकरणी तरुणाला अटक, सोन्याचे दागिने जप्त

पुणे/बारामती : Pune Baramati Crime News | बारामती तालुक्यातील सुपाजवळील शेरेवाडी येथे चोरीच्या उद्देशाने दोन महिलांची हत्या केल्याच्या प्रकरणात पुणे ग्रामीण पोलिसांनी २५ वर्षीय तरुणाला अटक केली आहे. पोलिसांच्या माहितीनुसार, आरोपीकडून चोरी केलेले सोन्याचे दागिनेही जप्त करण्यात आले आहेत.

विकास ऊर्फ अप्पा राजेंद्र लडकत Vikas alias Appa Rajendra Ladkat (वय २५, रा. शेरेवाडी, ता. बारामती, जि. पुणे) असे अटक करण्यात आलेल्या आरोपीचे नाव आहे.

या प्रकरणी २९ सप्टेंबर २०२६ रोजी सुपा पोलिस ठाण्यात गुन्हा दाखल करण्यात आला होता. गणेश मारुती लडकत (वय ४५) यांनी याबाबत फिर्याद दिली होती.

पोलिसांनी दिलेल्या माहितीनुसार, अज्ञात चोरट्यांनी फिर्यादीच्या घरात जबरदस्तीने प्रवेश करून कपाटातील सामानाची उचकापाचक केली होती. त्यानंतर घरासमोरील ओट्यावर झोपलेल्या दोन महिलांना लक्ष्य करण्यात आले.

इंदुमती मारुती लडकत (वय ७५) आणि कृष्णाबाई कुंडलिक लडकत (वय ५५) अशी मृत महिलांची नावे आहेत. त्यांच्या अंगावरील सुमारे पाच तोळे सोन्याचे, अंदाजे ₹६ लाख किमतीचे दागिने जबरदस्तीने काढून घेण्यात आले आणि धारदार शस्त्राने वार करून त्यांची हत्या करण्यात आल्याचा आरोप आहे.

गुन्ह्याचे गांभीर्य लक्षात घेऊन पुणे ग्रामीण पोलिसांनी स्थानिक गुन्हे शाखा, सुपा, दौंड, बारामती शहर आणि बारामती तालुका पोलिस ठाण्यांतील अधिकारी-कर्मचाऱ्यांची आठ पथके तयार केली.

तपासादरम्यान घटनास्थळ आणि परिसरातील CCTV फुटेज तपासण्यात आले. तसेच पथके अहिल्यानगर, सोलापूर, सातारा, बीड, कोल्हापूर आणि कर्नाटकातील निपाणी येथे पाठवण्यात आली. पोलिसांनी सांगितले की, अशा प्रकारच्या गुन्ह्यांची पार्श्वभूमी असलेल्या २०० हून अधिक संशयितांची पडताळणी करण्यात आली.

स्थानिक तपासादरम्यान विकास लडकत याच्या हालचाली संशयास्पद वाटल्याने पोलिसांनी त्याला ताब्यात घेतले. अधिक चौकशीत त्याने सोन्याचे दागिने चोरून दोन्ही महिलांवर कुऱ्हाडीने वार केल्याची कबुली दिल्याचा दावा पोलिसांनी केला आहे.

आरोपीकडून कथित चोरीचे सोन्याचे दागिने जप्त करण्यात आले असून सुपा पोलिस या प्रकरणाचा पुढील तपास करत आहेत.