Pune Crime News | पाकिस्तानी गँगस्टर शहजाद भट्टीशी संपर्काच्या संशयावरून राज्यभर ATS ची छापेमारी; पुण्यातील चौघांची चौकशी

पुणे : Pune Crime News | पाकिस्तानी गँगस्टर शहजाद भट्टी याच्याशी सोशल मीडियाद्वारे संपर्कात असल्याच्या संशयावरून महाराष्ट्र दहशतवाद विरोधी पथकाने राज्यभरात मोठी कारवाई सुरू केली आहे. बुधवारी सकाळपासून मुंबई, पुणे आणि इतर जिल्ह्यांमध्ये छापेमारी करण्यात येत असून, राज्यातील ५७ संशयितांची चौकशी सुरू असल्याची माहिती समोर आली आहे.

या ५७ संशयितांपैकी पुण्यातील चौघे जण भट्टीच्या संपर्कात असल्याचा संशय आहे. एटीएसने पुणे शहरातील वारजे, तसेच शिरूर आणि चाकण परिसरात छापे टाकून संबंधित व्यक्तींची माहिती घेतली. काही संशयितांचे मोबाईल संपर्क, सोशल मीडिया व्यवहार आणि ऑनलाइन हालचालींची पडताळणी सुरू आहे. काही मोबाईल फोन जप्त करण्यात आल्याची माहिती सूत्रांनी दिली.

एटीएसच्या वरिष्ठ अधिकाऱ्यांच्या माहितीनुसार, शहजाद भट्टी सोशल मीडियाच्या माध्यमातून भारतातील तरुणांशी संपर्क साधत असल्याचा संशय आहे. त्यांना पैशांचे आमिष दाखवून संवेदनशील ठिकाणांची माहिती गोळा करणे, शस्त्रांची वाहतूक, धमक्या देणे किंवा हल्ल्यांची रेकी करण्यास प्रवृत्त केले जात असल्याचा तपास यंत्रणांचा संशय आहे.

गँगस्टर शहजाद भट्टी कोण?

तपास यंत्रणांच्या माहितीनुसार, शहजाद भट्टी हा पाकिस्तानातून सक्रिय असल्याचा संशय आहे. त्याचे नाव गुन्हेगारी नेटवर्क, शस्त्र तस्करी, धमक्या, सोशल मीडिया रॅडिकलायझेशन आणि कथित आयएसआय-संबंधित कारवायांमध्ये समोर आले आहे.

एप्रिल २०२६ मध्ये दिल्ली पोलिसांच्या स्पेशल सेलने उघड केलेल्या एका प्रकरणात दिल्ली-एनसीआरमध्ये ग्रेनेड हल्ले, गोळीबार आणि टार्गेट किलिंगचा कट रचणाऱ्या कथित मॉड्यूलशी भट्टीचे नाव जोडले गेले होते.

सोशल मीडियातून तरुणांशी संपर्काचा संशय

तपास यंत्रणांच्या म्हणण्यानुसार, भट्टी इन्स्टाग्राम, व्हॉट्सॲप, एन्क्रिप्टेड प्लॅटफॉर्म आणि व्हिडीओ कॉलच्या माध्यमातून तरुणांशी संपर्क साधत होता. काही प्रकरणांमध्ये तरुणांना पैशांचे आमिष, तर काही ठिकाणी धार्मिक किंवा आक्रमक विचारसरणीच्या माध्यमातून प्रभावित करण्याचा प्रयत्न झाल्याचा संशय व्यक्त करण्यात आला आहे.

उत्तर प्रदेश, दिल्ली, पंजाब, राजस्थान आणि उत्तराखंडमध्ये भट्टीशी संबंधित काही संशयितांवर यापूर्वी कारवाई करण्यात आल्याची माहिती तपास यंत्रणांकडून देण्यात आली आहे.

पंजाबमधील घटनेनंतर भट्टीचे नाव चर्चेत

२०२५ मध्ये पंजाबमधील एका युट्यूबरच्या घरावर ग्रेनेडसदृश वस्तू फेकल्याच्या घटनेनंतर शहजाद भट्टीचे नाव चर्चेत आले होते. त्या घटनेची जबाबदारी सोशल मीडियावरील एका व्हिडिओद्वारे स्वीकारल्याचा दावा करण्यात आला होता. त्यानंतर पंजाब पोलिसांनी त्याची काही सोशल मीडिया खाती ब्लॉक करण्याची प्रक्रिया सुरू केली होती.

तपास सुरू, ATS कडून चौकशीला वेग

राज्याच्या सुरक्षेच्या दृष्टीने ही कारवाई संवेदनशील मानली जात आहे. पुण्यातील चौघांसह राज्यातील संशयितांची कसून चौकशी सुरू असून, त्यांच्या डिजिटल उपकरणांमधील माहिती, चॅट्स, कॉल रेकॉर्ड आणि आर्थिक व्यवहारांची तपासणी केली जात आहे. पुढील तपास एटीएसकडून सुरू आहे.