Alandi Pune News | पुणे : आळंदीतील वाहतूक कोंडी ठरली जीवघेणी; उपचारास उशीर झाल्याने निवृत्त CRPF जवानाचा मृत्यू
पुणे : Alandi Pune News | धार्मिक महत्त्व असलेल्या आळंदी शहरातील वाढती वाहतूक कोंडी पुन्हा एकदा जीवघेणी ठरल्याची धक्कादायक घटना समोर आली आहे. रविवारी वेळेत उपचार न मिळाल्याने निवृत्त CRPF जवानाचा मृत्यू झाल्याचा आरोप त्यांच्या कुटुंबीयांनी केला आहे.
मृत व्यक्तीचे नाव भिमाजी चौरे असून त्यांनी केंद्रीय राखीव पोलीस दलात (CRPF) सुमारे २३ वर्षे सेवा बजावली होती. रविवारी त्यांच्या राहत्या घरी त्यांना अचानक हृदयविकाराचा तीव्र झटका आला. कुटुंबीयांनी तातडीने त्यांना जवळच्या रुग्णालयात नेण्याचा प्रयत्न केला.
मात्र, घरापासून अवघ्या एक किलोमीटर अंतरावर असलेल्या रुग्णालयात पोहोचताना प्रचंड वाहतूक कोंडीचा अडथळा निर्माण झाला. परिसरात सुरू असलेल्या लग्नसमारंभांमुळे रस्त्यावर वाहनांच्या लांबच लांब रांगा लागल्या होत्या, ज्यामुळे वाहन पुढे नेणे अशक्य झाले.
परिस्थिती गंभीर होत असल्याने कुटुंबीयांनी कार मधेच सोडून रिक्षाने रुग्णालय गाठण्याचा प्रयत्न केला. यावेळी रिक्षाला मार्ग मिळावा यासाठी पत्नी व मुलगी रस्त्यावर उतरून वाहनचालकांना विनंती करत होत्या, तर मुलगा वडिलांना CPR देत होता.
तथापि, रुग्णालयात पोहोचण्यास उशीर झाल्याने ‘गोल्डन अवर’ गमावला गेला आणि डॉक्टरांना त्यांना वाचवता आले नाही. साधारण दोन-तीन मिनिटांचा प्रवास त्या दिवशी जवळपास वीस मिनिटांचा ठरला.
या घटनेमुळे आळंदीतील वाहतूक व्यवस्थेतील त्रुटी पुन्हा एकदा समोर आल्या असून, गर्दीच्या काळात योग्य नियोजनाचा अभाव असल्याची नाराजी स्थानिकांमध्ये व्यक्त होत आहे. दरम्यान, या प्रकरणी प्रशासनाकडून अद्याप अधिकृत प्रतिक्रिया देण्यात आलेली नाही.
