Annasaheb Pathare passes Away | ज्येष्ठ कुस्तीसंघटक अण्णासाहेब पठारे यांचे निधन ! क्रीडा क्षेत्रावर शोककळा; मंगळवारी खराडी येथे अंत्यसंस्कार

पुणे: Annasaheb Pathare passes Away |  ज्येष्ठ कुस्तीसंघटक, मल्लांचे आश्रयदाते म्हणून ओळख असलेले तसेच शिवछत्रपती राज्य क्रीडा जीवन गौरव पुरस्काराने सन्मानित पंढरीनाथ उर्फ अण्णासाहेब पठारे यांचे सोमवार दिनांक 11 मे 2026 रोजी सायंकाळी अल्पशा आजाराने दुःखद निधन झाले. त्यांच्या निधनाने क्रीडा, सामाजिक व राजकीय क्षेत्रात हळहळ व्यक्त होत आहे.

अण्णासाहेब पठारे यांनी कुस्ती क्षेत्राच्या विकासासाठी मोठे योगदान दिले होते. तळागाळातील कार्यकर्ते, खेळाडू आणि विविध क्रीडा स्पर्धांना त्यांनी नेहमीच आर्थिक व नैतिक पाठबळ दिले. अनेक नामवंत पैलवानांचे ते मार्गदर्शक व आश्रयदाते म्हणून परिचित होते.
ते हवेली कृषी उत्पन्न बाजार समितीचे माजी सभापती, माजी संचालक यशवंत सहकारी साखर कारखाना, तसेच खराडी गावचे माजी सरपंच होते. आमदार बापूसाहेब पठारे यांचे ते थोरले बंधू असून माजी नगरसेवक महेंद्र पठारे यांचे वडील तसेच नगरसेवक सुरेंद्र पठारे यांचे चुलते होत.
त्यांच्या पश्चात मोठा परिवार, मित्रपरिवार व असंख्य कार्यकर्ते असा परिवार आहे.

मंगळवार दिनांक 12 मे 2026 रोजी सकाळी 10.00 वाजता खराडी गाव येथील स्मशानभूमीत त्यांच्यावर अंत्यसंस्कार करण्यात येणार आहेत.