Pune Crime News | पुणे : कुत्रा भुंकल्याच्या रागातून दोन बहिणींना दगड, लाथाबुक्क्या आणि लोखंडी सळईने मारहाण; वाघोलीत दोघांवर गुन्हा

पुणे : Pune Crime News |  पाळीव कुत्र्याच्या अंगावर वाहन गेल्यानंतर कुत्रा भुंकल्याच्या कारणावरून झालेल्या वादातून दोन बहिणींना दगड, लाथाबुक्क्या आणि लोखंडी सळईने मारहाण केल्याचा प्रकार वाघोलीतील वाघमारे वस्ती येथे घडला.

या प्रकरणी ताराचंद काळराम वाघमारे Tarachand Kalram Waghmare आणि हिरामण काळराम वाघमारे Hiraman Kalram Waghmare (दोघे रा. वाघमारे वस्ती, वाघोली, ता. हवेली, पुणे) यांच्याविरुद्ध वाघोली पोलीस ठाण्यात गुन्हा दाखल करण्यात आला आहे.

ही घटना 15 सप्टेंबर रोजी रात्री सुमारे 10 वाजता घडली. तक्रारीनुसार, जयश्री चव्हाण यांच्या पाळीव कुत्र्याच्या अंगावर आरोपींपैकी एकाने वाहन घातले. त्यानंतर कुत्रा भुंकल्याने वाद सुरू झाला.

या वादातून ताराचंद वाघमारे याने जयश्री चव्हाण यांना मारहाण केल्याचा आरोप आहे. या हल्ल्यात त्यांच्या डोक्याला, छातीला आणि पाठीला दुखापत झाली.

जयश्री यांच्या मदतीसाठी त्यांची बहीण वैशाली पुढे आली असता तिलाही मारहाण करण्यात आल्याचे तक्रारीत नमूद आहे. हिरामण वाघमारे याने कथितरित्या लोखंडी सळईने वैशाली यांच्या डोक्यावर आणि कमरेवर मारहाण केली.

तसेच दोन्ही बहिणींना हाताने आणि लाथाबुक्क्यांनी मारहाण करून शिवीगाळ केल्याचाही आरोप करण्यात आला आहे.

जयश्री चव्हाण यांनी दिलेल्या तक्रारीवरून वाघोली पोलिसांनी दोघांविरुद्ध गुन्हा दाखल केला असून पुढील तपास सुरू आहे.