Maharashtra Weather Alert | महाराष्ट्रात हवामानाचा मोठा बदल: वादळी पावसासह 17 जिल्ह्यांना ‘यलो अलर्ट’, तर काही भागात उन्हाचा तडाखा
पुणे : Maharashtra Weather Alert | राज्यात सध्या हवामानाची दोन टोकाची रूपे पाहायला मिळत असून आज, २२ एप्रिल रोजी हवामान विभागाने महाराष्ट्रातील १७ जिल्ह्यांसाठी पावसाचा इशारा दिला आहे. बंगालच्या उपसागरातून येणाऱ्या बाष्पयुक्त वाऱ्यांमुळे आणि स्थानिक हवामानातील बदलांमुळे राज्याच्या अनेक भागात अवकाळी पावसाचे सावट निर्माण झाले आहे.
हवामान विभागाने दिलेल्या माहितीनुसार, आज विदर्भ, मराठवाडा आणि मध्य महाराष्ट्रात विजांच्या कडकडाटासह वादळी पावसाची दाट शक्यता आहे. विशेषतः छत्रपती संभाजीनगर, जालना, परभणी, हिंगोली, पुणे, अहमदनगर, कोल्हापूर, सांगली, सोलापूर, सातारा आणि विदर्भातील नागपूरसह सात जिल्ह्यांमध्ये पावसाचा ‘यलो अलर्ट’ जारी करण्यात आला आहे. या काळात ताशी ३० ते ५० किलोमीटर वेगाने वारे वाहण्याची शक्यता असून काही ठिकाणी गारपीट देखील होऊ शकते.
एकीकडे पावसाचे वातावरण असताना दुसरीकडे उत्तर महाराष्ट्र आणि विदर्भातील काही भागांत उन्हाचा कडाका कायम आहे. अनेक शहरांचे तापमान ४२ ते ४४ अंश सेल्सिअसपर्यंत पोहोचले असून, तिथे उष्णतेच्या लाटेचा इशारा देण्यात आला आहे. मुंबई आणि कोकण किनारपट्टीवर तापमानापेक्षा आर्द्रतेचे प्रमाण जास्त असल्याने नागरिकांना प्रचंड उकाड्याचा सामना करावा लागत आहे.
या बदलत्या हवामानाचा मोठा फटका शेतीला बसण्याची शक्यता आहे. काढणीला आलेली पिके आणि फळबागांचे नुकसान टाळण्यासाठी शेतकऱ्यांनी खबरदारी घ्यावी, असे आवाहन प्रशासनाने केले आहे. तसेच, नागरिकांनी दुपारच्या वेळी उन्हापासून संरक्षण करावे आणि विजांचा कडकडाट सुरू असताना झाडाखाली किंवा मोकळ्या जागेत थांबणे टाळावे, अशा सूचनाही देण्यात आल्या आहेत.
