Pune-Mumbai Expressway | प्रवाशांनो लक्ष द्या! मुंबई-पुणे एक्सप्रेसवेवर दोन दिवस ‘या’ वेळेत ‘मेगाब्लॉक’; जाणून घ्या सविस्तर
पुणे : Pune-Mumbai Expressway | महाराष्ट्र राज्य रस्ते विकास महामंडळाकडून (MSRDC) मिळालेल्या माहितीनुसार, एक्सप्रेसवेवर (डोंगरगाव/कुसगाव) परिसरात सुरू असलेल्या पुलाच्या कामासाठी ब्लॉक घेण्यात येणार आहे. या ठिकाणी पुलाचे लोखंडी शटरिंग काढणे आणि रंगकामाची तातडीची कामे पूर्ण केली जाणार आहेत. प्रवाशांच्या सुरक्षिततेसाठी कामाच्या दरम्यान या मार्गावरील वाहतूक पूर्णपणे थांबवली जाईल.
२३ एप्रिल (गुरुवार) : पुण्याकडून मुंबईकडे जाणारी वाहतूक बंद
गुरुवारी दुपारी १२:०० वाजता पुण्याकडून मुंबईच्या दिशेने जाणारी सर्व प्रकारची वाहने थांबवली जातील. हा ब्लॉक दुपारी ३:०० वाजेपर्यंत सुरू राहील. या काळात पुण्याकडून येणारी वाहने किवळे, देहूरोड किंवा सोमाटणे फाटा येथून जुन्या मुंबई-पुणे महामार्गावर (NH-48) वळवली जातील. ही वाहने पुढे कुसगाव टोल प्लाझा किंवा खालापूर येथून पुन्हा एक्सप्रेसवेवर प्रवेश करू शकतील.
२४ एप्रिल (शुक्रवार) : मुंबईकडून पुण्याकडे येणारी वाहतूक बंद
शुक्रवारी दुपारी १२:०० ते ३:०० या वेळेत मुंबईकडून पुण्याच्या दिशेने येणारी वाहतूक बंद असेल. मुंबईकडून येणारी वाहने खालापूर एक्झिटवरून जुन्या महामार्गावर वळवली जातील. ही वाहने लोणावळा शहर किंवा कुसगाव येथून पुन्हा पुण्याकडे येण्यासाठी एक्सप्रेसवेचा वापर करू शकतील.
ब्लॉकच्या काळात जुन्या महामार्गावर वाहनांचा भार वाढणार असल्याने तिथे वाहतूक संथ राहण्याची शक्यता आहे. त्यामुळे मुंबई किंवा पुण्याला जाणाऱ्या प्रवाशांनी शक्य असल्यास आपला प्रवास दुपारी १२ च्या आधी किंवा ३ च्या नंतर करावा. हलकी वाहने आणि रुग्णवाहिकांसारख्या अत्यावश्यक सेवांसाठी स्थानिक पोलीस परिस्थितीनुसार मार्ग मोकळा करून देतील, मात्र जड वाहनांना पर्यायी मार्गाचाच अवलंब करावा लागेल.
