Pune Sarasbaug Close | पुणेकरांसाठी महत्त्वाची बातमी; सारसबाग 28 आणि 29 मे रोजी दोन दिवस राहणार बंद
पुणे : Pune Sarasbaug Close | शहरातील नागरिकांची आवडती आणि पुण्याच्या ओळखीचा अविभाज्य भाग असलेली सारसबाग 28 आणि 29 मे या दोन दिवसांसाठी बंद ठेवण्यात येणार असल्याची माहिती समोर आली आहे. या निर्णयानंतर शहरात विविध चर्चांना उधाण आले असून सोशल मीडियावरही याबाबत वेगवेगळ्या प्रतिक्रिया उमटताना दिसत आहेत.
बकरी ईदच्या पार्श्वभूमीवर हा निर्णय घेतल्याची चर्चा सुरू असतानाच पुण्याच्या महापौर मंजुषा नागपुरे यांनी याबाबत स्पष्टीकरण दिले आहे. त्यांनी सांगितले की, पुणे पोलिसांनी शहरात जमावबंदीचे आदेश लागू केले असून कायदा व सुव्यवस्था राखणे हा निर्णयामागील प्रमुख उद्देश आहे.
नागरिकांची सुरक्षितता सुनिश्चित करण्यासाठी आणि कोणतीही अनुचित घटना टाळण्यासाठी प्रशासनाने दोन दिवस सारसबाग बंद ठेवण्याचा निर्णय घेतल्याचे त्यांनी स्पष्ट केले. सार्वजनिक ठिकाणी होणारी गर्दी नियंत्रणात ठेवणे आणि शहरातील शांतता अबाधित राखणे हाही या निर्णयामागील महत्त्वाचा हेतू असल्याचे सांगण्यात आले.
दरम्यान, सकाळी फिरण्यासाठी, व्यायामासाठी आणि कुटुंबासोबत वेळ घालवण्यासाठी मोठ्या संख्येने नागरिक सारसबागेत येत असतात. त्यामुळे दोन दिवस बाग बंद राहणार असल्याने अनेक पुणेकरांनी नाराजी व्यक्त केली आहे. मात्र परिस्थिती सामान्य झाल्यानंतर सारसबाग पुन्हा नियमितपणे नागरिकांसाठी खुली करण्यात येणार असल्याचे प्रशासनाने स्पष्ट केले आहे.
