Statue of Lokmanya Tilak In Mauritius | मॉरिशसमध्ये लोकमान्य टिळकांच्या पुतळ्याचे मॉरिशसचे महामहिम राष्ट्रपती श्री धर्मबीर गोकूल यांच्या हस्ते अनावरण

मुख्यमंत्री देवेंद्र फडणवीस यांनी व्हिडिओ कॉन्फरन्सद्वारे साधला संवाद

लाँग माउंटन, मॉरिशस : Statue of Lokmanya Tilak In Mauritius | लोकमान्य टिळक विद्यालयाच्या शताब्दी महोत्सवानिमित्त आयोजित एका भव्य समारंभात, मॉरिशसचे राष्ट्रपती महामहिम श्री धर्मबीर गोकूल यांनी आज हिंदी प्रसारणी सभेद्वारे संचालित लोकमान्य टिळक विद्यालयाच्या आवारात लोकमान्य बाळ गंगाधर टिळक यांच्या अर्धपुतळ्याचे अनावरण केले. त्याचवेळी मॉरिशसमधील महाराष्ट्र मंडळाच्या टिळक हॉलमध्येही एका अर्धपुतळ्याचे अनावरण करण्यात आले.

१९ व्या शतकाच्या सुरुवातीपासून भारतीय विविध प्रांतातील लोक ऊस कामगार म्हणून मॉरिशस येथे येण्यास सुरुवात झाली. त्याच कालावधीत म्हणजे १९ व्या शतकाच्या उत्तरार्धात लोकमान्य टिळक प्रमुख राजकिय नेते म्हणून उदयास येऊ लागले. २० व्या शतकाच्या पूर्वार्धात देशातील अग्रगण्य राजकीय नेते म्हणून लोकमान्यांना मान्यता मिळाली, सहाजिकच त्यांच्या नेतृत्वाचा प्रभाव मॉरिशस येथे असलेल्या भारतीयांवर असणे स्वाभाविक आहे. त्यामुळे १९२६ साली स्थापन झालेल्या हिंदी विद्यालयास त्यांचे नाव देऊन स्मृती जपण्याचे काम मॉरिशस येथील लोकांनी केले आहे. आजचा हा समारंभ त्या चिरस्थायी श्रद्धांजलीचे शंभर वर्षे पूर्ण झाल्याचे द्योतक आहे.

हे अनावरण हिंदी प्रसारणी सभेच्या अध्यक्षा श्रीमती रोहिणी रामरूप यांच्या विनंतीवरून आयोजित करण्यात आले होते. या समारंभाला अनेक मान्यवर उपस्थित होते, यात शिक्षण मंत्री डॉ. महेंद्र गुणप्रसाद, आरोग्य व कल्याण मंत्री मा. अनिल कुमार बाचू, संस्कृती मंत्री मा. श्री महेंद्र गुंडिया, आणि भारताचे मॉरिशसमधील उच्चायुक्त श्री अनुराग श्रीवास्तव, श्री दिलीप ठाणेकर तसेच हिंदी प्रसारणी सभा व महाराष्ट्र मंडळाचे सदस्य यांचा समावेश होता.

लोकमान्य टिळक विचार मंच आणि श्री शैलेश टिळक यांनी या दोन्ही संस्थांना प्रतिमा भेट दिल्या. या समारंभात लोकमान्य टिळकांचे पणतू श्री शैलेश टिळक, पणती श्रीमती अंजली राहळकर, खापरपणतू व पुणे महानगरपालिकेचे नगरसेवक श्री कुणाल टिळक आणि श्रीमती श्रुतिका कुणाल टिळक हे उपस्थित होते. ही प्रतिमा श्री विवेक खटावकर यांचे पुत्र श्री विपुल खटावकर यांनी साकारली.

मॉरिशसच्या राष्ट्रपतींचे भाषण

माननीय श्री धरमबीर गोखूल यांनी भव्य सभेला संबोधित केले आणि हिंदी प्रसारणी सभा व टिळक कुटुंबीयांचे कार्यक्रम आयोजित केल्याबद्दल त्यांना शुभेच्छा दिल्या. त्यांनी या कार्यक्रमाला मॉरीशस आणि भारत यांच्यातील एक जिवंत पूल असे वर्णन केले. ते पुढे म्हणाले की, मॉरीशसमध्ये हिंदी भाषेचे शिक्षण हा भारतीय समुदायाच्या समृद्धी आणि उन्नतीसाठी अत्यंत महत्त्वाचा आहे. त्यांनी सांगितले की, “आपली भाषा गेली तर आपली संस्कृतीही हरवून जाईल.” श्री गोखूल यांनी श्री नरेंद्र मोदी आणि श्री एस. जयशंकर यांच्या मॉरीशस दौऱ्याबद्दल त्यांचे मन:पूर्वक आभार व्यक्त केले आणि दोन्ही राष्ट्रांमधील दीर्घकाळ टिकणारे संबंध प्रस्थापित करण्यासाठी त्यांच्या योगदानाबद्दल कृतज्ञता व्यक्त केली.

मुख्यमंत्री श्री देवेंद्रजी फडणवीस यांचा व्हिडिओ संदेश

महाराष्ट्राचे मुख्यमंत्री श्री देवेंद्रजी फडणवीस यांनी या कार्यक्रमाला व्हिडिओ संदेशाद्वारे संबोधित केले. त्यांनी म्हटले की, मॉरिशसमध्ये लोकमान्य टिळकांच्या प्रतिमांचे अनावरण हे भारत आणि मॉरिशस यांच्यातील घनिष्ठ व चिरस्थायी बंधनाचे, तसेच भारताच्या अत्यंत आदरणीय स्वातंत्र्यसेनानी व समाजसुधारकांच्या अमर वारसाचे प्रतीक आहे. भारतीय वंशाच्या महत्त्वपूर्ण मॉरिशियन लोकसंख्येमुळे, ज्यातील अनेकांचे मूळ महाराष्ट्राशी जोडले जाते, मॉरीशस आणि महाराष्ट्र यांच्यातील भागीदारी सर्व क्षेत्रांत सतत अधिक मजबूत होत चालली आहे. असे कार्यक्रम या दोन्ही प्रदेशांमधील बंधुभावना अधिक दृढ करतात आणि आमच्यामध्ये जीवंत पूल म्हणून भारतीय डायस्पोराची जीवंतता अधोरेखित करतात.

लोकमान्य टिळक विद्यालयाचा शताब्दी महोत्सव हा हिंदी प्रसारणी सभेसाठी आणि मॉरिशसमधील व्यापक भारतीय प्रवासी समुदायासाठी एक अभिमानास्पद टप्पा आहे. त्यांनी या उत्कृष्ट कार्यक्रमाचे आयोजन केल्याबद्दल श्री शैलेश टिळक आणि श्री कुणाल टिळक यांचे आभार व्यक्त केले.