Bacchu Kadu | शिवसेनेकडून प्रहार पक्षाचे बच्चू कडू यांना विधान परिषदेची ऑफर
मुंबई : Bacchu Kadu | महाराष्ट्र विधान परिषदेच्या रिक्त होणाऱ्या ९ जागांसाठी येत्या १२ मे २०२६ रोजी निवडणूक होत आहे. या निवडणुकीच्या रणधुमाळीत आता एक अत्यंत महत्त्वाची घडामोड समोर आली आहे. उपमुख्यमंत्री एकनाथ शिंदे यांनी प्रहार जनशक्ती पक्षाचे अध्यक्ष आणि माजी राज्यमंत्री बच्चू कडू यांना विधान परिषदेची उमेदवारी देण्याची अधिकृत ‘ऑफर’ दिली आहे. स्वतः बच्चू कडू यांनी या माहितीला दुजोरा दिला असून, यामुळे राजकीय वर्तुळात चर्चांना उधाण आले आहे.
गेल्या काही दिवसांपासून बच्चू कडू हे महायुतीवर आणि विशेषतः सरकारच्या काही धोरणांवर नाराज असल्याची चर्चा होती. ही नाराजी दूर करण्यासाठी आणि त्यांना सोबत ठेवण्यासाठी एकनाथ शिंदे यांनी मुंबईत कडू यांची भेट घेतली. या बैठकीत शिंदेंनी शिवसेनेच्या कोट्यातून त्यांना विधान परिषदेवर पाठवण्याचा प्रस्ताव ठेवला आहे. शिवसेनेला आपल्या संख्याबळावर दोन जागा सहज निवडून आणता येतील, त्यातील एक जागा बच्चू कडू यांच्यासाठी सोडण्याची तयारी दर्शवली आहे.
बच्चू कडू यांनी ऑफर मिळाल्याचे मान्य केले असले तरी, त्यांनी अद्याप कोणताही अंतिम निर्णय घेतलेला नाही. “विधान परिषदेच्या जागेपेक्षा आमच्यासाठी अपंग मंत्रालय, शेतकरी कर्जमाफी आणि आदिवासींचे प्रश्न जास्त महत्त्वाचे आहेत,” असे म्हणत त्यांनी आपल्या मागण्यांकडे सरकारचे लक्ष वेधले आहे. त्यामुळे केवळ आमदारकीसाठी ते ही ऑफर स्वीकारणार की आपल्या इतर अटी मान्य करून घेणार, याकडे सर्वांचे लक्ष लागले आहे.
